luns, 2 de marzo de 2020

O galego, unha lingua transfronteiriza

O pasado venres 21 de febreiro celebrouse o Día Internacional da Lingua Materna. Este ano a UNESCO quixo salientar as linguas locais e transfronteirizas para promover o diálogo e o patrimonio cultural dos pobos que as falan. O galego é, dalgunha maneira, unha lingua transfronteiriza, na medida en que serve como ponte con Portugal e, en xeral, coa lusofonía. 

Tendo en conta que este centro está a menos de 10 km de Portugal e o gran contacto que existe entre o sur de Galicia e o norte de Portugal, alumnado de 2º de Primaria elaborou un mapa de Galicia e norte de Portugal con palabras semellantes nas dúas linguas. Ademais, crearon un podcast no que entrevistan a un alumno do centro sobre a súa experiencia nun colexio de Portugal.

Aquí están algunhas fotos do traballo e a entrevista realizados. 
 


sábado, 29 de febreiro de 2020

Síntome Rosalía cando...

Dende o CEIP Barrantes queremos agradecervos a vosa participación no mural colaborativo sobre Rosalía de Castro e convidarvos a visitalo. As vosas achegas son moi interesantes e cargadas de sentimento. Aquí vos deixamos algunhas imaxes do traballo realizado.

#ErrantesPoloMundo_rde_20


luns, 24 de febreiro de 2020

Día de Rosalía: Errantes polo mundo

O CEIP Barrantes, como os anos anteriores, volveu unirse á proposta da Asociación de Escritores en Lingua Galega (AELG) para celebrar o Día de Rosalía. O lema da proposta deste ano é Errantes polo mundo e convida a reflexionar sobre as inxustizas sociais das migracións, vixentes na actualidade e tamén presentes na obra de Rosalía.

O alumnado de Infantil e Primaria realizou debuxos ou escolleu imaxes que asociou a versos de Rosalía de Castro. Aquí vos deixamos unha mostra do traballo realizado.

Esperamos que estes versos vos sirvan de inspiración para participar na actividade de Síntome Rosalía cando... O mural non deixa de crecer coas vosas achegas! Cando estea rematado compartiremos imaxes, ademais de convidarvos a visitalo.

#ErrantesPoloMundo_rde_20






venres, 21 de febreiro de 2020

EntRoido baRRantiño: Reducir, Reutilizar e Reciclar

Este ano, seguindo a temática do centro sobre vida saudable, alumnos e mestres disfrazáronse reutilizando materiais. Os disfraces salientaban a importancia do coidado dos mares.

Ante as familias que viñeron compartir estes momentos con nós, o alumnado desfilou a ritmo da canción de Veleiro verde disfrazado de mergulladores, medusas, caramuxos, rochas impregnadas de chapapote e de fondo mariño que seguía ao barco barrantiño de Greenpeace reclamando un maior coidado dos nosos mares. Tamén cantaron con lingua de signos a canción de Nai Terra de Chayanne e recitaron unha graciosas coplas do meco que insistían na importancia de respectar o medio ambiente.

Graciñas por compartir estes momentos tan especiais con nós e que teñades un fantástico entroido!


venres, 7 de febreiro de 2020

Apertas que voan

Con motivo da celebración do Día Escolar da Non Violencia e a Paz, o CEIP Barrantes organizou distintas actividades ao longo da semana nas que se implicou activamente o alumnado. Ademais, cada mañá, alumnos, mestres e familias compartiron cancións en distintas linguas sobre esta temática. Para as persoas que non puideron compartir estes intres de convivencia, invitámosvos a escoitar a canción de Apertas que voan de Paco Nogueira, temática escollida tamén por Infantil para traballar a Paz.




venres, 20 de decembro de 2019

Un Nadal solidario

Este ano fixemos unha celebración moi especial no CEIP Barrantes. Comezamos a mañá con obradoiros de adornos de Nadal nos que contamos coa colaboración das familias. Despois, puxemos o noso gran de area cun obradoiro solidario para SOS Tomiño. Coa inestimable axuda das familias, fixemos paquetiños cos doces de Nadal doados e escribimos os nosos mellores desexos de Nadal para as persoas que os reciban. 

Foi necesario realizar unha pequena pausa para recuperar folgos, así que alumnado, familias e profesorado compartimos unha chocolatada organizada pola ANPA. Por último, empregámonos a fondo no Mercadillo de Nadal para a viaxe de fin de curso. 

Non podemos deixar pasar esta oportunidade para darvos as grazas pola vosa implicación e desexarvos un bo Nadal. Vémonos á volta de xaneiro con enerxías renovadas para continuar aprendendo día a día. 


Un magosto para compartir

O pasado 19 de novembro celebramos o magosto no CEIP Barrantes. A pesar deste outono chuvioso, o mal tempo non impediu que familias, alumnado e profesorado do centro se reunisen e compartisen non só castañas asadas, senón risos e bos momentos. As nenas e nenos tamén tiveron oportunidade de utilizar a manualidade reciclada que elaboraran en Samaín para gardar as castañas, dándolle así unha segunda vida a material de refugallo.

Aproveitamos para lembrar que a Carreira Barrantiña está posposta ata próximo aviso. Mentres, estades todos convidados a botar unha ollada aos materiais sobre coidado do medio ambiente enviados pola ONG Amigos da Terra, á que se destinan os fondos que se recaden nesta carreira solidaria.