Un Samaín de medo!

O pasado venres, 28 de outubro, celebramos o Samaín no CEIP Barrantes. Ademais de aprender sobre a orixe desta festa e sobre criaturas típicas da nosa terra, tivemos tempo de facer xogos, poñer a proba a nosa creatividade e habilidades plásticas e, especialmente, de aprender e pasalo ben! De feito, o Samaín deste ano trouxo unha novidade: unha Disco Samaín! Cantamos, bailamos e pasámolo de medo cos compañeiros e compañeiras dos outros grupos! Despois de varios anos se poder xuntarnos, aproveitamos a ocasión para facer o que nos gusta: compartir os bos momentos.

Aquí vos queda un vídeo cheo de diversión e amizade:

Un magosto de xogos populares!

O pasado venres, 14 de outubro, celebramos o magosto no CEIP Barrantes e que mellor maneira de festexalo que con xogos populares e castañas ben quentiñas! O alumnado de 6º exerceu de monitor dos xogos e o de 5º de capitán de equipo. Así, os oito equipos formados por nenas e nenos de Infantil e Primaria gozaron de distintos xogos populares antes de degustar as castañas. Aquí vos deixamos un vídeo:

Visita da banda de gaitas San Vicente de Barrantes

O pasado venres visitou o centro Hipólito, o profesor da banda de gaitas San Vicente de Barrantes. Ademais de presentarnos varios instrumentos musicais galegos como a gaita, o charrasco, as cunchas, etc., explicounos os ritmos da muiñeira e da foliada. O alumnado de Primaria quedou impactado coa súa habilidade para crear melodías tradicionais. Como colofón, tocou unha muiñeira acompañado por Lucas, un alumno do centro que tamén forma parte da banda de gaitas San Vicente de Barrantes.

V Certame de Literatura en Prosa, Verso e Ilustración

Durante o mes das Letras Galegas convocouse o V Certame de Literatura en Prosa, Verso e Ilustración do CEIP Barrantes. Un ano máis, o xurado tivo difícil a escolla das gañadoras e gañadores debido á alta participación e a gran calidade dos traballos presentados. Aquí vos deixamos un vídeo que recolle a entrega de premios. 

Correlingua 2022

O pasado venres 20 de maio, o CEIP Barrantes participou no Correlingua celebrado en Tomiño. Ataviados con pegatinas que promocionan o uso do galego, alumnado e profesorado gozaron coa Mekanika Rolling Band. 

 

 

O galego conéctanos
con cousas boas e fermosas,

con xente talentosa e intelixente.

Aproveita que
aínda podes…

e FÁLAME!

 

(Manifesto do Correlingua 2022) 

Florencio Delgado Gurriarán, o poeta da terra.

O autor homenaxeado desde ano é Florencio Delgado Gurriarán. O alumnado do CEIP Barrantes investigou a vida e obra deste poeta valdeorrés e elaborou as seguintes producións que podedes ver nestes vídeos.

Así mesmo, todo o alumnado do centro participou na elaboración dun mural colectivo para rendirlle homenaxe a Florencio Delgado Gurriarán. Cada grupo elaborou postais con fotos de recunchos de Galicia e escribiu poemas sobre eles. 

Galicia infinda!

Nosa Galicia é máis que toda a Terra.

Non é xa o cativo currunchiño

que din escolas vellas.

Cómprenos desbotar antigos erros

fillos de mente estreita:

Galicia infinda!

Día da Poesía

O pasado 21 de marzo celebramos o Día da Poesía. Para conmemoralo, no CEIP Barrantes compartimos poesías. Cada nena e neno escribiu un poema, atouno cunha lazada e deixouno nunha mesa para que outro alumno do centro o levara para casa. Que emoción desatar o lazo e ler un poema novo!

 

Para írmonos preparando para o Día das Letras Galegas, deixámosvos un poema de Florencio Delgado Guarriarán, autor homenaxeado deste ano.

 

Galicia infinda!

Nosa Galicia é máis que toda a Terra.

Non é xa o cativo currunchiño

que din escolas vellas.

Cómprenos desbotar antigos erros

fillos de mente estreita:

Galicia infinda!

Semana da Prensa e 8M: Camiñando Xuntas

Este ano aproveitamos a celebración da Semana da Prensa para reflexionar sobre a igualdade entre mulleres e homes. Baixo o lema "Camiñando Xuntas", o alumnado de Infantil e Primaria elaborou un mural cooperativo no que recompilou noticias e artigos xornalísticos que visibilizan o papel das mulleres na sociedade. Así mesmo, as familias contribuíron á creación desta homenaxe ao 8M que simboliza as pegadas firmes das mulleres que loitan a cotío pola igualdade e a visibilización.

 

 

Un Entroido Superecolóxico!

O pasado venres 25 celebramos o Entroido no CEIP Barrantes. Cada grupo inventou un heroe / heroína cun poder ecolóxico e creou o seu disfrace con materiais de refugallo ou reciclables.

Nos días previos ao Entroido, o Meco Ciclón, que non fai máis que contaminar, deu as ordes que obedeceron os alumnos. Disfrazáronse de Tanxugueiras, deportistas, do que lles apetecía e de durmilóns. Así mesmo, o Meco Ciclón puxo a proba os coñecementos do alumnado sobre o coidado do planeta. Cada mañá, as distintas clases recibiron unha pregunta sobre a ecoloxía que os invitaba a reflexionar sobre o impacto das nosas accións no medio ambiente.

O venres 25, os Superecolóxicos, fartos de tanta contaminación, viñeron ao rescate do CEIP Barrantes, rapearon as Coplas do Meco e reciclaron ao Meco Ciclón! Aquí vos deixamos un vídeo deste día tan especial!

Pensamentos de Rosalía

Hoxe celebramos o nacemento de Rosalía de Castro sumándonos, un ano máis, á proposta da Asociación de Escritores en Lingua Galega.  

O alumnado de Infantil ata 2º de Primaria traballou un poema de Rosalía de Castro, co que elaborou pétalos con palabras ou versos de Rosalía empregando distintas cores e tipografía. Os grupos de 3º a 6º de Primaria realizaron unha pequena composición poética e elaboraron pétalos de distintas cores e tipografía. 

Así mesmo, as familias volveron colaborar na elaboración dun mural no que completaron, de xeito libre, os dous versos centrais da estrofa de Cantares gallegos: Adiós, ríos; adiós, fontes; / adiós, ... / adiós, .../ non sei cando nos veremos.

Aquí vos deixamos dous vídeos que resumen este día tan especial para as galegas e galegos. 

 

 

A lingua materna e as posibilidades da tecnoloxía

A temática proposta pola UNESCO para a celebración do Día Internacional da Lingua Materna 2022 é a utilización da tecnoloxía para a aprendizaxe multilingüe. Por iso, o alumnado de 5º e 6º de Primaria, que empregan E-dixgal no seu día a día, seleccionaron diversas páxinas e aplicacións para practicar e avanzar na adquisición de distintas linguas. Recompiláronnas na seguinte ligazón para que podades consultalas:

Con motivo do Día da Paz, ademais de traballar os valores asociados á non violencia nas aulas, elaboramos un mural colaborativo no que participou todo o alumnado do centro. Esta actividade a nivel centro pon en valor a importancia da cooperación no traballo e de manter unha actitude conciliadora nos proxectos comúns. Tal e como Mahatma Gandhi dixo: "non existe camiño para acadar a paz; a paz é o camiño". 

 

 

Por un Nadal de cantigas e risas

Tras unha mañá de chocolatada e diversión, desde o CEIP Barrantes queremos desexarvos un bo Nadal.Non hai mellor xeito de facelo que con estes versos de Antonio García Teijeiro:

 

Cantigas e risas

veñen anunciar

que peta na porta

a luz do Nadal.

 

Un Nadal que amose

como vai a vida.

Un Nadal que cure

con paz as feridas.

 

25N: Que o teu desexo non sexa fugaz

Para conmemorar o Día Internacional da Eliminación da violencia contra a muller, realizamos dous murais conxuntos nos que participou a comunidade educativa.

Por unha banda, baixo o lema “Que o teu desexo non sexa fugaz”, e coa colaboración das familias, colgáronse estrelas elaboradas con materiais refugallo que tiñan desexos contra a violencia.

Por outra banda, nas aulas traballouse este tema en profundidade. O alumnado, a partir da lectura  do conto Rosa Caramelo, realizou distintas actividades. AS nenas e nenos de Infantil, 1º e 2º de EP reflexionaron sobre o feito de que os xoguetes non teñen xénero: todas e todos podemos xogar ao que máis nos guste. O alumnado de 3º e 4º analizou a moda sexista e descubriu que a maquillaxe e as saias poden ser usadas por homes, ademais de que calquera pode vestirse como máis lle guste. Os maiores de 5º e 6º adicáronse a investigar sobre os teitos de cristal e reflexionaron sobre o complexo que lles resulta a moitas mulleres acceder a postos directivos ou de responsabilidade.

 

Fagamos que os nosos desexos non sexan fugaces! 

Un Samaín feiteceiro

Por fin chegou o día de Samaín! E con el, un feitizo que pechou as portas do cole ata que o alumnado descrubriu ao responsable! A Santa Compaña púxonolo difícil, pero empregámonos a fondo e atopamos todas as pistas que nos levaron a descubrir quen andaba detrás do meigallo. Xuntos, non hai obstáculo que se nos resista! Aquí vos deixamos un vídeo sobre o día de Samaín:

 

Tamén deixamos aquí dous vídeos coas actividades relacionadas co Samaín levadas a cabo polo alumnado . Cada grupo investigou un ser terrorífico e elaborou unha produción sobre el: poesías, manualidades, murais... Botádelle unha ollada!

Magosto en Barrantes

O pasado venres, 15 de outubro, celebramos o Magosto en Barrantes. Que mellor maneira de abrir o apetito que comezar cunha carreira! Despois de tanto exercicio, nada mellor que unhas castañas quentiñas!

Descubrindo a Xela Arias

Algo pasou no mural de Xela Arias... Varias palabras desapareceron! O alumnado buscounas polo patio e tivo que colocalas no lugar correcto para completar así a biografía da homenaxeada das Letras Galegas deste ano. Foi unha oportunidade para pasalo ben, traballar en equipo e aprender máis sobre esta poeta e defensora da nosa lingua. 

Aquí vos deixamos algunhas fotiños. 

 

Senlleiras: As mulleres das letras

Onte visitou Barrantes o detective Castelao (Pedro Brandariz). Resulta que se están a cometer moitos crimes contra a lingua galega. Menos mal que contamos con cinco mulleres que traballaron de espías para defender e promocionar a nosa lingua! De xeito ameno e divertido, viaxamos polo tempo para coñecer un pouco máis a Rosalía de Castro, Francisca Herrero, María Mariño, María Victoria Moreno e Xela Arias, as cinco homenaxeadas nas Letras Galegas. O detective Castelao plantexounos un reto: seremos quen de unirnos na defensa da nosa lingua e na procura de igualdade para nenas e nenos? O alumnado do CEIP Barrantes apuntouse sen dubidalo!

As letras de Xela

O Día das Letras Galegas deste ano homenaxea a Xela Arias, natural de Sarria que arraigou en Vigo. Foi poeta, escritora, tradutora, editora e profesora. Ante todo, foi unha defensora e promotora da nosa lingua. Para coñecer mellor a súa faceta de poeta, o alumnado do CEIP Barrantes escolleu distintos poemas de Darío a diario, obra que lle adicou ao seu fillo Darío. Despois de traballalos na aula, elaboraron distintas producións sobre os sentimentos e ideas que lles transmitía a lectura dos poemas. Aquí vos deixamos dous vídeos sobre o traballo realizado. 

IV Certame de literatura en prosa, verso e ilustración

O pasado venres tivo lugar a entrega de premios do IV Certame de literatura en prosa, verso e ilustración do CEIP Barrantes. O xurado salientou a calidade das obras presentadas, así como a dificultade para seleccionar as gañadoras. Os asistentes puideron apreciar as obras gañadoras, que foron explicadas polos seus autores (no caso das ilustracións) ou lidas (no caso dos microrrelatos e poemas).

Tal e como salientaron os presentadores da cerimonia (Blanca e Álex de 6º de Primaria), quen le moito e anda moito, ve moito e sabe moito (Miguel de Cervantes).

Aquí vos deixamos un vídeo.